Di Jogg afn Brunfthirsch; für mi foscht die schienschte und sponnendschte. Leschtn Herbscht onni noch 4 Johr wortn wiedr geterft afn T-Hirsch gien. Leidr isch genau de Zeit bi mir mit viel Orbit und wenig Freizeit vrbundn.

Decht ots mi, kaum homkemmin, in Berg auigizogn. A wenn Znocht net viel Zeit bleib, zumindescht binni draußn gwedn und on mein Glick probiert!

On vor dr Jogg a pour Pirschgänge gmocht, so onne gwisst wo sich is Rotwild ungefähr auholtit.

So binni donn in 30. September um 6e af Nocht no gstartet und on a Platzl augsuecht, wosimr Touge drvor schun amol ongschaug on, hoch und unwegsom ischs gwedn. A net letzr Plotz um afn Hirsch zi passn, auholtn tuet ar se in der Gegend. Teifilisch ot man in Hirsch gschpirt und mit zuigien onnimr gidenkt:“Do kannts heint eppis wissen!“

Obr kurz drau binne donn zi an Rudl Hausgoas kemmin, an a ruhigs weitarkemmin isch nimmar zi denkn gwedn, zi gern attn se a Solz vi mir kopp. „Oje wos ietz – hel awie wortn vielleicht giense galling weitar“ onnimr gidenkt. Und weil de Geslar asö longsom vi mir fudrfressn heris nebm mir, hintr an Tschoggl junge Feichtn krochn und olm wiedr. Und durch de Tschuppn umme sige galing a Moment eppi Rots! Mir schießts in Köpf :“Des wert wöll net a Hiersch sein!“ Und af gach sieg i ihn – dr Hirsch treib a Tier!!!! Lei 60 m seinse vi mir weck. Ietz ischs do is Joggfiebr – und wie! „Wos ietz?“, zi viel Bam sein mr in Weg. Schnell entschließ i mi ibr an Groubm hintr mir awie tiefar oizipirschn, nor siege bessar hintr de Jungfeichtn aue. Oanzige Meglichkeit und de were probiern zi nutzn!

Und bolle donn tiefar untn – in Rucksock onne schu hintnglott – vi den Groubm außarschleich, schaug me 80 m obr mir kerzngiroud dr Hirsch ou! Bode seinmr gstondn, starr wie Seiln! Lei is Haupt onne vi ihm gsegn, sischt ischar gonz vin Jungwoll vrdeckt gwedn. Long taurn se de Sekundn, obr donn ottar kurz zrugggschaug und is Haupt hintr an Larch kopp. Mein Moment um di Bix unbemerkt in Onschlog zi bringin. Aui mit dr Bix afn Jagarsteckn, sponnin und mitn Glous in Hiersch suechn! „Wennar ietz an Schritt virargeht nor kriegin, wennar oudrahnt isch nicht.“ Und af gach mochtar an Schritt firrar und will weitargien. Des isch ietz mei Moment um zi mein Jagarglick zi kemmin! Is Fodnkreiz afs Blott und schun otz gschnellt – in Glous siege in Hirsch nö an tiefn Sprung firi mochn und schun ischar widr in Jungwoll vrschwundn. Kurz geht mr is Geschehene durchn Köpf „Oukemmin binne guet – den ots!“

A kurze Zeit spetar here nö in den Waldl öübm a krochn und a tiefis Röcheln. Und nor nicht mehr – olls isch still. Mei Herz schlogg – obr wie!!!

Is Beschte wert sein awe zuewortn, und erscht spetar aui schaugn gien. I onnmr amol a Zigrettl ougizundn und probiert zi realisiern wos in di leschtn Minutn gongin isch – donn onni meine Leit ouglietn und drzeilt. Dr Kommentar vin Luis: „Bische lei a Kolb“!

Meine Kollegn, mei Frau und dr Bartl oubm gsogg sie kemmin und weils schu finstr gwortn isch one entschiedn erscht mit ihmin zi mein Hirsch auezigien -  dr Bartl ot di Hund mit, di sem findnin sichr gschwing.

Und asö ischs gweidn, lei a kurze Todesflucht ottar no gmocht.

A riesige Frei onne kopp – und meine Leit mit mir mit. Mit Ehrfurcht oubmr ihm in leschtn Bissn gebm. Donn seinmr mitnondr nö a Weil bin Hirsch ghuckt und bi an Flaschl Wein onne ihnen logisch di Gschicht drzeilt, vielleicht a zwomol!

Sponnendar und schienar konn i mr die Hirschjogg net vörstelln, a Donk in olle de mir gholfn oubm in Hirsch zi bergn und logisch a drnouch awe zi feirn – hel khert ofoch drzue.

Weidmannsheil

                                                                                                              Bericht und Fotos: Franz Spiess, Revier Sarntal